Speech of President Aquino at the press briefing on Ebola Virus, November 7, 2014
[Inihayag sa Villamor Airbase, Lungsod Pasay, noong ika-7 ng Nobyembre 2014]
Kagagaling lang po natin ng Guiuan, Eastern Samar kanina, at doon po, personal nating kinamusta ang mga kababayan nating sinalanta ng bagyong Yolanda. Makalipas nga po ang isang taon, nalulugod tayong makita ang mga pagbabago sa sitwasyon ng ating mga kababayan doon.
Habang inaasikaso po natin ang rehabilitasyon ng mga sinalantang komunidad, hinaharap din natin ang panibagong mga hamon sa ating bansa. Pag-usapan po natin ang Ebola virus disease. Malamang nabalitaan na po ninyo, nagkaroon ng outbreak ng sakit na ito sa West Africa. Nitong Agosto, idineklara na rin ito ng World Health Organization bilang isang Public Health Emergency of International Concern. Mayroon na rin pong naitalang mga kaso nito sa ilang mga bansa. At bilang bahagi ng pandaigdigang komunidad, anuman ang mangyari sa ibang bahagi ng mundo, maaaring maapektuhan din tayo. Tandaan lang po natin: Mayroon tayong tinatayang sampung milyong tayong kababayang naghahanapbuhay at naninirahan sa ibang bansa. Obligasyon po ng estadong pangalagaan ang ating mga kababayan, nasaan man silang panig ng daigdig.
Kaya nga po, bilang ambag ng ating bansa, magkakaloob tayo ng halagang di-bababa sa isang milyong dolyar sa United Nations sa pagsisikap na maagapan ang pagkalat ng Ebola virus disease.
Nang kumalat po ang MERS-Coronavirus ngayong taon sa Gitnang Silangan, at magkaroon ng banta nito sa ating bansa, wala tayong inaksayang oras upang pagbutihin ang ating sistema sa pagtugon, sakali mang makapasok ang naturang virus sa Pilipinas. Nilagdaan po natin, nabanggit ko sa inyo, ang Executive Order No. 168 na bumuo ng task force upang tutukan ang suliranin sa pagkalat ng mga sakit na maaaring magdulot ng panganib sa ating bansa. Maigting po tayong nakikipag-ugnayan sa World Health Organization ukol sa mga epektibong hakbang upang mapaghandaan at matugunan ang paglaganap ng mga nakakahawang sakit. Isama ko na rin po na nakikipag-ugnayan din tayo sa Center for Disease Control sa Amerika base sa Atlanta para nga madagdagan an gating kaalaman. Inilalatag po natin ang epektibong paraan upang masubaybayan ang exposure ng mga kababayan natin sa mga sakit, partikular na ang nasa ibang bansa upang mapauwi sila, habang pinapangalagaan ang kanilang kalusugan at ng ating kababayan dito.
Kaya, nang mabalitaan natin ang pagkalat ng Ebola virus disease sa Liberia, nagpasya tayo, pabalikin na ang ating 142 nating peacekeepers na nakadestino doon. Sila po ang mga kababayan nating pinadala sa ibang lugar upang makibalikat sa pagtataguyod ng kapayapaan.
Bilang Commander-in-Chief, at ama ng bansa, hindi ko ho maaatim na hayaan lang silang manatili sa lugar kung saan maaari silang mahawa ng nakamamatay na sakit. Hindi naman natin puwedeng sabihin sa kanila, “Maraming salamat sa serbisyo ninyo sa amin, pero bahala na kayo sa buhay ninyo diyan.” Hindi ho maka-Pilipino ho ‘yan. Wala naman sigurong magsasabing “Hindi ko na problema ‘yan, wala akong pakialam sa kanila.” Dahil anuman ang ating pananampalataya, tinuruan po tayong magmalasakit at ituring na kapatid ang ating kapwa.
Ang pagpapabalik natin sa ating tropa mula sa Liberia ay bahagi lamang ng tungkulin ng estadong pangalagaan ang kapakanan ng mga nagmamalasakit sa bayan. Humihingi tayo ng pang-unawa sa ating mga peacekeepers, lalo na sa kanilang pamilya. Sa loob ng 21 araw, nabanggit na kanina po, hindi muna sila makakauwi sa sariling tahanan; pagbabakasyunin muna natin sila sa isang isla kung saan maaari silang mag-relax at magpahinga. Bahagi ito ng itinakdang proseso ng inyong gobyerno upang siguruhing hindi lalaganap ang Ebola virus sa bansa or makakapasok ang Ebola Virus sa bansa. Linawin ko lang po: Hindi ibig sabihin na dahil nanggaling sila sa lugar na laganap ang Ebola, taglay na rin nila ang virus. Kailangan lang po muna nating tiyaking ligtas na silang makihalubilo sa iba. Quarantine po ang tawag nga dito.
Kanina po, nagkaroon ng briefing ang kasalukuyang Acting Secretary ng DOH na si Dr. Janette Loreto-Garin ukol sa Ebola virus—saka si Dr. Lyndon Lee Suy. Inilatag nila ang mga datos kaugnay sa nasabing sakit, at ang ating mga inisyatiba upang agapan ito. Bukod sa briefing, mayroon na ring information campaign ang DOH ukol dito. Nawa’y naliwanagan nito ang marami nating mga kababayan. Kung mayroon man kayong mga katanungan, bukas po lagi ang tanggapan ng ahensya upang bigyan kayo ng kaukulang sagot. Ang atin pong panawagan: Huwag nating pairalin ang takot o pangamba dahil sa kawalan o kakulangan ng kaalaman.
Gaya po ng lagi, sa pagtutulungan at sama-sama nating pagkilos, mas mapapadali at mas magiging epektibo ang katuparan ng ating mga kolektibong layunin. Patuloy naman pong aarugain at papangalagaan ng estado ang Pilipino nasaan man siyang panig ng mundo, tungo sa pagtataguyod ng ligtas at masiglang bukas para sa ating bansa.
Para manigurado lang po, kanina, noong pinakita ‘yung screening procedures natin, hindi lang po ‘yung mga camera, hindi lang po ‘yung personnel, pero pati na rin ‘yung dokumentong papakita sa atin, tulad ng mga pasaporte; titingnan at sisiyasatin kung gumawi kayo doon sa tatlong bansang nabanggit, or tumira kayo doon, para nga masigurado na may tsansa, miski maliit, na baka na-expose, ay hindi maging potensyal na magdudulot ng problema sa ating bansa. At hindi po ho tapos ‘yung mga pagaayos natin ng proseso. Pahihigpitin pa na natin nang pahihigpitin ‘yan, para masigurado nga ho na hindi tayo magkakaroon nitong mga sakit, na ‘pag hindi naagapan kaagad ay talagang malaki ang konsekuwensiya.
Maraming salamat po sa inyong lahat.
Source: Official Gazette of the Philippines and the pictures used herein are taken from google.com
Comments
Post a Comment